الشاعر بدر بن عويد دنيا بلا خلان وشلون تنطاق
دنيــا بـلا خــلاّن وشلــون تنطــاق
بعـض الحقـايـق مُـرّهـا مـا نطقـها
ذابت مراكب بحرها وسط الاشفاق
واللّيـل خيّــم في مراسـي غرقهــا
ضاع الأمل لو هو ترك درب مشراق
جــوّ الخريـف يبيـد أخضــر ورقهـا
روحٍ عليها مْن الوَسِـم نوض بــرّاق
مـن هـو يـردّ الــرّوح ياللي سرقهــا
وجهك معي من وين ما روح مشتاق
فـزّزت بـي ســـربٍ تظلّــل غسقهـــا
بـاصيـدلك معنـاي من حـدّ الأرمـاق
واحطّ جولــك في مرامـي فشقهــا
هيضتـني كثـــر الأكــارم للإنفـــاق
وقيدتني فـي دار وحــدي طرقهـــا
خوّفتـني كثــر التوجّــد مـن امـلاق
وغيّبتني فـي غمـــرةٍ مـن ضيقهـــا
ولـولا زهـورك في وريـدي لهــا ســاق
ما سقــت لـك شعــرٍ يبــاري عبقهــا
.
